REAS Euskadik, Eusko Jaurlaritzaren Garapenerako Agentziaren laguntzarekin, 2016an, genero berdintasunaren aldeko erakunde-aldaketako prozesu bat hasiko du, erakunde baten funtzionamendu maila guztietan ematen diren genero ezberdintasunak ezabatzeko helburuarekin: estrategiak, egiturak, lan-sistemak, politikak eta erakunde-kultura.

Prozesu honi “Bizigarri” izena jarri diogu, hots, bizitzeko egokia dena, bizia ematen duena, pizten duena …

Prozesuaren lehenengo urratsa, abiatze egoeraren Diagnostiko bat izango da. Horrela, 2017an, diagnostikoan agertzen diren ezberdintasunak gainditzera bideratuta dagoen Ekintza-plana diseinatzeko beharrezkoak diren elementuak izango ditugu. Prozesu honek, 2018tik aurrera sarearen genero-politika bat definitzeko beharrezkoak diren osagaiak eskainiko dizkigula uste dugu.

ZER DA 2016 HASIKO DUGUN DIAGNOSTIKOAN AZTERTUKO DUGUNA?

Lan-plangintza 6 ataletan oinarritzen da: REAS Euskadiren berdintasunaren aldeko aurretiko lanaren ibilbidea; sare-politikaren erlazionatutako guztia, hau da, linea estrategikoak, aurrekontuak, jarraipen eta ebaluaketa sistemak; erakundearen egitura eta bere lan-prozesuak eta pertsonen kudeaketa; komunikazioa eta ikasketak; erabaki-hartze prozesua eta, azkenik, jarrera, erakunde-kultura eta konpartitutako balioak.

ZELAN EGINGO DUGU DIAGNOSTIKO HAU?

Prozesuak izaera parte-hartzailea dauka eta sareko entitateek parte har dezaketen hausnarketa eta eztabaida espazioak sortuko dira (tailerrak, eztabaida taldeak, …). Egitura egonkorrak hurrengo hauek dira:

• Kanpo dinamizatzailea: Silvia Piris
  
• REAS Euskadiko genero arduraduna: Zaloa Pérez (zperez@reaseuskadi.net)
  
• Barne Genero taldea (BGT): prozesuaren talde motorea da. Bertan, diagnostikoaren osagaiei buruz hausnartuko da, informazioa bilduko da eta aurrerapausoak kontrastatuko dira. Erakundeko maila guztiak ordezkatzen dituzten pertsonek osotzen dute (zuzendaritza batzordea, langileak, sareko erakundeak, …)
  
• Kanpo Aholkulari Taldea (KAT): erabiliko ditugun metodologien kontraste taldea da eta hurrengoek osatzen dute: EQUIPARE, Koop.elk.txikia, INCYDE, Iniciativas de Cooperación y Desarrollo, genero arduraduna eta kanpo dinamizatzailea.
  
• Jarraipen batzordea: REAS Euskadiko entitateen asanblada.

ekoSol buletinen bidez, prozesuaren aurrerapausoen berri izango duzue eta, erakunderen batek informazio gehiago nahi baldin badu, genero arduradunarekin kontutan jar daiteke.