Euskadiko Merkatu Sozialaren 2020 Katalogoa

Merkatu Soziala, pertsonen eta bizitzaren iraunkortasunaren zerbitzura dauden praktika ekonomiko alternatiboak sustatzeko helburuarekin, REASek (Ekonomia Alternatibo eta Solidarioaren Sarea) sustatutako eta Olatukoopek (Ekonomia Sozial eta Eraldatzailea Sarea) lagundutako ekimen bat da. Ekonomia solidarioko entitate eta enpresak, ekonomikoki esanguratsuak izateko, elkarlanean aritzen diren merkatua da. Ekoizle txikiek, beren ekoizpenaren salmenta eta banaketa kontrolatzen duten merkatua. Bakarka daukaten indarra biderkatzeko helburuarekin, kontsumitzaile arduratsuek aktiboki parte hartzen duten merkatua. Irabazi asmorik ez duen merkatua, ekonomia eta mundu bidezkoago eta jasangarriagoa eratzen laguntzen duelarik.

Laburbilduz, irizpide etiko, demokratiko, feminista, ekologiko eta solidarioekin funtzionatzen duen ondasun eta zerbitzuen ekoizpen, finantzaketa, banaketa eta kontsumo sare bat da. Sarea, ekonomia solidarioaren entitate eta enpresez eta banakako zein taldeko kontsumitzailez osatuta dago.

Euskal Herriko Merkatu Sozialaren katalogo honetan, sektore ezberdinetako ekonomia solidarioaren 120 enpresa eta entitate ingururen produktu eta zerbitzuak aurkezten dira. Merkatu kapitalistatik ahal den neurrian deskonektatzen gaituen kontsumo kritiko, kontziente eta eraldatzaile baterako katalogoa da.