Egungo eredu ekonomiko kapitalista gainditu eta pertsonak, ingurumena, lurraldea eta osasuna erdigunean jarriko dituena eraikitzeko bidea jorratzen segitzen du Koop57, iaztik aurrezki etiko eta solidarioaren esparruan diharduen kooperatibak.

Bilbon atzo egindako agerraldian, dei berezia egin zieten oinarri horiek partekatzen dituzten herritar eta kolektiboei sistema ekonomikoa eraldatzeko subiranotasun esparru ezberdinak artikulatzera, izan elikaduran, energian, zaintzan eta, jakina, finantzetan.

“Gureak diren baliabideak, guk erabil ditzagun” leloa iparrorratz hartuta, jendea beren egiturako bazkide egitera bultzatu nahi dute, aurrezki horiek aipatu printzipioetan oinarritutako proiektuak finantzatu ahal izateko. Xede horrekin, datozen asteetan hainbat eragile politiko, sozial eta sindikal eraldatzaile, talde feminista, ekologista eta euskalgintzakoekin bilerak egingo dituzte.

GARA