O recoñecemento da interdependencia e da ecodependencia, así como o anhelo transformador das iniciativas e organizacións da Economía Solidaria, implica unha relación intensa entre estas e a contorna na que se desenvolven, así como un compromiso coa súa mellora. Trátase dunha ollada local que se complementa coa necesaria comprensión da interrelación entre as dinámicas supraterritoriais que perseguen a xustiza ecosocial a nivel global. 

O compromiso coa contorna supón coñecer e recoñecer, implicarse, colaborar e artellarse co resto dos axentes que conforman o tecido socioeconómico no que actúa e se enraíza a Economía Solidaria. Implica a promoción e o impulso de modelos de produción, distribución e consumo centrados no territorio, desde onde construír propostas comunitarias de mellora e, a través de alianzas que provoquen un efecto multiplicador, unha axenda de transformación ecosocial que transite do local ao global.

Supón, así mesmo, un forte compromiso coa cultura local, recoñecendo, á súa vez, a diversidade de identidades e expresións sociais e culturais existentes. Desde a devandita perspectiva, este compromiso implica, particularmente, coñecer e recoñecer as persoas da contorna en situación de vulnerabilidade e desvantaxe social para poder artellar respostas ás súas necesidades e intereses, favorecendo a súa inclusión a través das iniciativas da Economía Solidaria e da transformación do modelo socioeconómico.

Para desenvolver este compromiso coa contorna, cómpre coidar e fortalecer os vínculos e o traballo en rede entre as propias persoas e entidades da Economía Solidaria, así como establecer alianzas con outras redes coas que construír un suxeito económico, social e político de carácter solidario, feminista, antirracista e decolonial. Así mesmo, é importante, asumindo a pluralidade e a diversidade, establecer colaboracións con outros axentes sociais e institucionais que permitan desenvolver políticas e estratexias de transformación territorial.

Este compromiso require tomar conciencia da realidade social e territorial, ademais de fortalecer o sentimento de pertenza á comunidade. Para logralo, na intervención coa contorna, cómpre colocar no centro as persoas, os coidados, a saúde e o benestar, asumindo a natureza como suxeito e apoiando os procesos locais e comunitarios.