Toda actividade humana é ecodependente, polo que desde a perspectiva da sustentabilidade ecolóxica se recoñece os seus límites ambientais e se promove o compromiso de convivencia positiva coa contorna natural e o mantemento da súa riqueza no presente e no futuro.

A Economía Solidaria recoñece a natureza como suxeito de dereitos, polo que coloca os seres vivos e a reprodución da vida no centro de todo proceso social e económico. Por iso, asume os límites biofísicos do planeta, promove o sostemento dos ecosistemas e comprométese co seu coidado. Neste sentido, considera a sustentabilidade ecolóxica como un principio central no seu compromiso coa saúde do planeta e coa sustentabilidade da vida, asumindo a necesidade de asegurar a supervivencia de todos os seres vivos.

Desde esa perspectiva, a Economía Solidaria considera o decrecemento material como unha obriga necesaria tras un proceso histórico de explotación dun planeta de recursos limitados.  O compromiso cunha transición ecolóxica esixe decrecer nos procesos de extracción de recursos naturais, no uso de fontes de enerxía, na sobreexplotación dos solos fértiles e no mantemento dos actuais niveis de produción e consumo que destrúen a biodiversidade e os ecosistemas necesarios para a vida.

Diante da crise ecosocial que hipoteca os recursos naturais e pon en perigo a propia existencia humana e de toda expresión de vida, a Economía Solidaria promove un novo paradigma centrado en sentir e soster a vida do planeta. Para conseguilo, comprométese con non causar máis danos e reparar as contornas ambientais, aprendendo das cosmovisións de pobos e culturas que manifestan e practican a convivencia coa natureza e o respecto dos seus ciclos e procesos.

Fronte á xeración de precariedade, pobreza e desigualdade do actual modelo socioeconómico, o compromiso da Economía Solidaria coa sustentabilidade ecolóxica baséase en lóxicas de xustiza e solidariedade global, onde a distribución e a repartición da riqueza son elementos centrais dese novo modelo que coida a vida e o planeta.