Perante un sistema que se caracteriza por xerar múltiples desigualdades e opresións, a Economía Solidaria propón unha transición cara a novos modelos nos que a equidade sexa un elemento central nas relacións entre persoas, comunidades e pobos, así como co planeta. Unhas relacións horizontais que recoñezan positivamente e integren a diversidade.

A equidade incorpora ao obxectivo da igualdade as perspectivas complementarias da xustiza e a diversidade. Supón recoñecer e considerar a igualdade de oportunidades, condicións e trato, á vez que establecer un repartición xusta de obrigas, recursos e responsabilidades. Trátase dun valor necesario para recoñecer e garantir o dereito de toda persoa a vivir unha boa vida desde os principios da universalidade e a singularidade, así como dos seus intereses e necesidades vitais.

Fomentar a equidade implica garantir o dereito de todas as persoas a non estar sometidas a relacións baseadas na dominación, sexa cal sexa a súa condición socioeconómica, de xénero, orientación e identidade sexual, idade, cultura, orixe, crenzas, linguas, situación legal, capacidades… así como calquera outra característica obxecto de discriminación.

Incorporar o principio de equidade nas iniciativas da Economía Solidaria supón fortalecer o seu carácter transformador e inclusivo, así como priorizar a tarefa de construír espazos habitables nos que se cuestionen os privilexios e nos que calquera persoa poida participar desde o recoñecemento da súa diversidade. Espazos que promovan a igualdade de oportunidades a través de prácticas que visibilicen e transformen os sistemas opresivos e posibiliten a transición cara a modelos máis equitativos e corresponsables.

O compromiso co principio de equidade implica a todas as estruturas e a todas as personas que, dun xeito ou doutro, forman parte das organizacións e redes da Economía Solidaria, mais tamén ás súas relacións con outras persoas e entidades sociais.
Trátase, así mesmo, dun criterio de relación co conxunto da sociedade e cos diferentes territorios, rurais e urbanos, xeograficamente próximos ou afastados e, particularmente, con aquelas persoas e comunidades que soportan maiores niveis de desigualdade e discriminación.