Moito máis ca un emprego ou unha ocupación, o traballo é toda actividade humana que fai posible que a vida se sosteña, sexa tratada con coidado e se reproduza, tanto no presente como no futuro. Por iso, desde a Economía Solidaria, recoñécense os traballos en plural, produtivos e reprodutivos, profesionais e voluntarios, remunerados e gratuítos.

Así mesmo, enténdese o traballo como unha ferramenta de acción colectiva ao servizo das necesidades da comunidade e da sustentabilidade da vida, orientada cara ao desenvolvemento das capacidades e ao apoderamento individual e colectivo.

A interdependencia e a ecodependencia son asumidas como procesos básicos e necesarios para a nosa supervivencia, polo que, particularmente, os traballos de coidados entre as persoas, comunidades e co planeta sitúanse como prioritarios para a organización social. Compartir a responsabilidade e distribuír equitativamente a súa provisión é indispensable para promover a calidade de vida das persoas, a comunidade e a súa contorna ambiental, así como para desenvolver unhas relacións sociais e económicas xustas.

Por iso, a Economía Solidaria promove un emprego digno, saudable e emancipador, baseado na cooperación e no equilibrio salarial, no dereito a participar na propiedade dos medios de produción e na toma de decisións. Un emprego dirixido a producir bens e servizos socialmente útiles de forma equitativa e sustentable.

Como forma de superar as dinámicas de empobrecemento crónico e precarización vital, as experiencias da Economía Solidaria ofrecen ás persoas os recursos e o tempo preciso para gozar de vidas que pague a pena vivir. Para conseguilo, promoven iniciativas cooperativas, autoxestionadas, participativas e transparentes que satisfagan necesidades e contribúan ao benestar individual e colectivo. Estas iniciativas deben garantir o desenvolvemento das capacidades persoais, a repartición de todos os traballos, así como a creación de emprego estable e de calidade que facilite a inclusión social e económica nun ambiente de igualdade de oportunidades.

Mediante a proposta dun nova repartición, valorización e reorganización social de todos os traballos, a Economía Solidaria impulsa un cambio cultural que permita superar as lóxicas dualistas de dominación e fragmentación entre as diferentes esferas que concirnen a vida das persoas. En último termo, perséguese revalorizar a vida en todas as súas dimensións e etapas.