Datorren martxoaren 3an, “Global Forum Spain”-en 1go edizioa Bilbon ospatuko da. Bertan, Europako eta nazioarteko finantza erakundeen buru nagusiek, banku eta enpresa multinazionalen zuzendariek, zein Europako, estatuko eta Euskadiko hainbat ordezkari politikok parte hartuko dute. Foroaren xedea “2014ko europar ekonomia eta ekonomia globalaren gakoei buruz eztabaidatzea”. Gertaera honen aurrean, ekaINetik, Euskadiko Gizarteratzearen Aldeko Sareak, gure iritzia eman nahiko genuke.

Ekonomia kapitalistaren egungo norabidearen ezaugarri, planeta osoan zehar bazterketa eta bidegabekeria sortzeko daukan gaitasuna da. Sistema  ez demokratikoa da hau, kontrol politiko eta hiritarretik at, ekonomia errealaren gainetik espekulazioa jartzen duena, baita mozkinen maximizazioa pertsonen zaintza, ingurugiro jasangarritasuna eta herrien bizitzen onaren gainetik. Mozkinak, inolako kezka barik bakar batzuen artean banatzen dira, urritasuna eta miseria gure gizarteetako biztanleriaren gehiengoaren artean zabaltzen diren bitartean.

Horiek, dira Europa eta munduko ekonomiaren gako nagusiak, pertsona, herri eta ingurugiroarentzat ondorio latzak dakartenak. Gainera, troikak inposatutako eta gobernu ezberdinek bultzatutako babes-sistema publikoetan emandako murrizketa eta herstura neurriengatik, ondorio horiek larriagotu egin dira.

Guzti honen emaitza, gure gizartean eman den pobrezia eta ezberdintasunen hazkunde izugarria da. Langabezia, bizi-baldintzen  prekarizazioa, kaleratzeak, energia-pobrezia, genero ezberdintasunak, gazteen emigrazioa, landa-inguruaren suntsiketa edo etxegabeen hazkundea; kontrolaturik ez dagoen libre merkatuaren garapena, finantza-espekulazioa, babes-sisteman murrizketak eta biztanleriaren eskubide sozialen galeraren ondorioak dira. Aurretik esandakoari, mezu eta jarrera arrazista, diskriminatzaile eta ez-solidarioen hazkuntza larria gehitu behar zaio.

Gizarteratzea, giza eskubideen defentsa, hiritarren partaidetza edota tresna ekonomiko alternatiboen sustapenaren esparruan lan egiten dugunok, Bilbon ospatuko den gertaera aprobetxatuz, gaur eguneko egoera ekonomiko eta sozialaren larritasuna salatu nahi dugu. Hori dela eta, bidezkoagoa, inklusiboagoa eta jasangarria den ekonomia bat aldarrikatzen dugu. Baita sexu, jatorri, edo egoera sozioekonomikoaren inguruko bereizketa egin barik, pertsona guztientzako eskubide sozialen kohesio eta erabileraren mantentzea bermatzen duen politika publikoen norabide aldaketa proposatzen dugu.

Enplegu duinaren eraketan politika eraginkorrak, gizarte-sarien areagotzea, etxebizitza eta baliabide energetikoei heltzea ahalbidetzen duten politikak, behar beste, unibertsalak eta kalitatezko zerbitzu publikoen mantentze eta hobetzea, gizarteratze programen bultzada, ekonomia sozial eta solidarioko ekimenen sustapena, etab.

Halaber, arrakasta gero eta gehiago daukaten eta hiritartasunak, erakunde sozialek eta gure sareek esparru ekonomiko eta sozialean sustatzen dituzten praktika alternatiboak aintzat hartzeko aprobetxatzen dugu: garapen komunitariorako planak, mestizajea eta kultur aniztasuna sustatzeko guneak, baztertutako pertsonentzat laguntza eta bultzatze jarduerak, nazioarteko lankidetza, elkartasunerako hiritar-sentsibilizazioa, hondakinen berreskuratze, berrerabilpen eta birziklapena, gizarteratze enpresen, kooperatiben edota gizarte-enpresen bulkada, banka etikoaren garapena, kontsumo lokala eta elikadura- edo energia-subiranotasunaren sustapena, etab. Praktika hauen baitan, bizitza jasangarritasunaren zerbitzura dagoen Euskal, Europar eta mundu ekonomia eta politika bat sortzeko zenbait “gako” dago.

Azkenik, “Global Forum Spain”-aren ospakizuna dela eta gizarte-mugimenduek antolatutako mobilizazio eta ekintzetan hiritartasunak parte har dezan deialdia egiten dugu. Orobat, antolatzera eta ekonomia, gizartea eta munduak norabide alternatibo, bidezkoagoa eta inklusiboagoa har dezaketela erakusten duten alternatiba raktika horien eraketan parte hartzera jendea gonbidatzen dugu.

Euskadi, 2014ko otsailak 27

EkaIN, Euskadiko Gizarteratzearen aldeko Sareak